Li’l Joe can’t hide fuh too long

Everybody, except dem boys, believe that when Guyana get a change in govt, skulduggery would have been a thing of de past. Dem boys know all governments does got some thieves inside so dem know that thiefing gun tek place.
Wha dem didn’t expect to hear and see is wha dem hearing and seeing now. Dem see thief men from de old govt deh side by side them like lovers, wid some of Soulja Bai people.
Now dem got people who talking how it look like if this lean, clean and mean govt just tek off de underwear from de old government, tun it over, and put it on.

That is what dem boys call, six of one and half a dozen of de other. Some people seh is not a change, is an exchange while dem boys think that dem lending one another dem bukta and panty.

In de old govt Luncheon use to bluff. He start fuh tell you one thing and by de time he done talk you done forget wha he begin wid. He use to lie through he nose, he teeth and he behind.
Li’l Joe tek he position in de new govt and it look like he want to start behaving like Luncheon. He tell all dem reporter how he gun hold a press conference  and answer all dem question—why and how he appoint BK; how much people went wid him to China, wha he do in China and how much money govt pay fuh that trip because of course, Clinty de Willie was there. He love big basha and jumbo prawns—a very expensive dish in China.
All dem reporter wake up early yesterday morning waiting to hear from Li’l Joe. De man disappear, tun off he phone, never respond to ee e-mail and didn’t go to wuk.
Dem boys know de reason why he didn’t tun up. He woulda have to tell de nation why he give de order to stand down from seizing BaiShanLin luxury vehicles wha dem bring in fuh wuk gold and timber.

Talk half and there is a saying, You can run but you can’t hide.