Moses photos fully bulletproof
Nov 03, 2018 , Kaieteur News, https://www.kaieteurnewsonline...s-fully-bulletproof/
Everybody know you got to protect youself at all cost. But it look like de coalition got to hire a rocket scientist to mek dem understand dat.
A foreigner come fuh tell dem boys dat Guyana ain’t got no protection against de oil people. There is no rules or regulations set out, no guidelines to curtail lawlessness.
De man seh, de country got to do background checks on all dem banks and investors who running to Guyana to put dem hand pon de oil money.
Dem boys want to know why foreign people got to come fuh lecture de govt.
Now, if you got you house and you expect some people to come and spend some time wid you, de fuss thing you gon do is protect wha li’l you got.
If is money, you gon put proppa lock pon de wardrobe; if you got girl children, you does put on bolt pon de bedroom door.
Well three years now Guyana know dat a set a oil people gon be here and de govt ain’t do nutten to secure de country. If dis continue, it gon be a free for all and all de foreigners might end up having more rights than Guyanese.
And dem boys don’t want to believe de politicians, including Jagdeo and ee PPP, don’t know bout protection.
All of dem protecting dem private lives and dem wealth. Nuff of dem got security guards and electronic gate. Some of dem got grill round dem window.
One of dem even protecting he pictures of ee self. Dem boys couldn’t believe wha dem hear yesterday.
Dem know politicians does spend nuff taxpayers dollars pon dem health, dem teeth, dem eye and dem pickney. But dem never hear so much tax dollars spending pun photographs.
Moses spend de bulk of ee budget protecting ee pictures. Dem boys hear ee tek a selfie, print it then put a iron frame around it. When he done, he order and pay fuh bulletproof glass to cover it.
Nobody woulda know if parliament didn’t question ee budget money. Moses spend $2.1M to frame dem photographs.
If he spend dat amount, dem boys don’t want to see de bill fuh Soulja Bai photos.
Talk half and hope Greenidge ain’t tek out nuff photos because he don’t have a nice face.