Granger and Ramjattan fall in love fuh Valentine

A big wedding in de planning stage and is not any big one or he son or daughter. In fact, it look like people who married already mekking up bed fuh lie down together. Hap New and Hay Heff See get together and dem hustle one another. People hear bout de union and now dem waiting fuh see if was a case of somebody trying fuh get a live home. Is de sex. Something good had to happen now dem want to stay together. Dem boys watch how Granger watch Ramjattan in he eye and smile. Ramjattan smile back. Then dem whisper. Now it look like if dem gun hug up. And while de two of dem looking at one another wid love in dem eyes Donald and Rohee complaining. Dem seh that if dem got to have any wedding, it got to be between Donald and Granger. Dem is de two who been here de longest. Dem use to hold hands since Burnham and Cheddi time and it ain’t fair that because Jagdeo mek people get vex wid he that dem gun now tun dem back pun everybody. Donald seh that from de time he tun president he use to invite Granger fuh dem talk. He now know that he shoulda invite Granger and Ramjattan. By now he woulda deh in gool because when he prorogue parliament he woulda got de two of dem talking so much that dem wouldn’t find time fuh do de mischief dem now doing. Jagdeo done seh that if he was in charge he woulda never get into such a situation because he woulda stand down and leh Sam tek de cuss and when de cussing he woulda step back up, cuss Sam and life woulda go on. But fuh now Happy Valentine.