Nuff smart flies surfacing
Apr 09, 2017 , http://www.kaieteurnewsonline....art-flies-surfacing/
From small people learn that dem don’t wear red when dem passing by a bull. And when dem sit down and watch television dem does see de bullfighter waving a red cloth in front de bull and de bull does charge.
Well de other day some bright people who know that Guyanese stupid come and tell people how dem bull colour blind, that dem don’t see colour. Somebody seh that it easy to prove. When Jagdeo deh pun de elections campaign he must go and stand up in front of a bull.
De truth is that people should never approach a bull from de front. Dem boys also know that nobody should approach a horse from de rear. Now dem learn that nobody should approach an idiot from any side.
De news come that Guyana got oil and all of a sudden people start to approach people to train dem in oil. Dem boys know that dem mother was cooking wid oil from de time dem small. And when dem ain’t cooking dem using kero oil in a lamp.
People who had foot problem know bout coconut oil. In fact, people like Uncle Adam who want to look nice does rub coconut oil pun dem face.
But it got to be that Guyanese stupid because people opening school to teach people bout oil. Whoever decide to open de schools think that dem smart so dem targeting all dem people who dem think is idiots. Dem mekking a reality of de fact that a fool and his money are soon parted.
But old people know wha happen wid de smart fly. Dem who setting up de oil schools better find out.
Talk half and watch how you approaching anything