Only a wife and dem boys can find all seven trillion nerves in you body
Feb 12, 2019 , Kaieteur News, https://www.kaieteurnewsonline...-nerves-in-you-body/
A man got bout seven trillion nerves in he body. Believe it or not, it don’t tek long fuh he wife to find all of dem. She does do that in about a minute.
GECOM ain’t much different from a husband. It already telling people how dem boys does get pun all seven trillion nerves in every member.
And GECOM got nuff people but dem boys know how to get pun all dem nerves.
Last week nuff groups picket GECOM. De PPP start then de APNU+AFC continue. When that done dem boys decide to call more people to picket GECOM. Of course, is GECOM got to seh when it ready fuh elections.
Dem boys write how people seh GECOM stalling. Since then, nobody in GECOM not talking to dem.
But dem boys don’t care bout that. Dem got a right to represent people. Jagdeo had more than seven trillion nerves and dem boys always find every one. He come out of power and he still vex and cussing dem boys.
He was suh vex that when he was sharing out radio stations he didn’t give de Waterfalls paper any. He tell people that if de Waterfalls paper can torment him every day wid one news paper imagine what it gun do when it get radio.
Is when Soulja Bai come in that de Waterfalls paper get a radio. But that ain’t stop dem boys from getting pun APNU+AFC nerves.
Dem boy seh that is not only politicians does get vex wid dem boys. Some big man who should be protecting children deh pun a mission. Parents minding dem daughters just like how a farmer does grow mango.
And indeed dem gyal just like mango. That is wha got dem big man in trouble. Dem boys seh some men does sit down and wait fuh de mango fuh ripe. But dem big man does pick dem and eat dem wid pepper and salt.
Talk half and know that dem boys gun find all you nerves.