Patrick de Yarde Fowl just like Mugabe
May 03, 2017 , http://www.kaieteurnewsonline....wl-just-like-mugabe/
Frigging and rigging is two things that can never done in this world. Tek Donald Duck. He win de American election and on to now months past and he don’t know how he win.
What de people find out is that he is not only frigging up America, he is frigging up de world. Then comes Guyana’s biggest dummy, Donald Dumb. He don’t know on to now how he get knock out ee own party. He now deh home watching TV and going to one, one wedding house.
Patrick de Yard Fowl know how he get in. Dem boys believe he didn’t only rig de election, he frig it up. He election didn’t have voters’ list, he mek people vote wid pencil and got people stand over dem wid big eraser to see how dem vote.
When people vote fuh Gaspar dem erase de vote. Dem mek Irfaat look like joke when it come to using de lead pencil and big eraser. Gaspar didn’t know he get frig before de ballot box dem come in, suh he spend wasteful nights outside de union hall watching dem box.
He coulda been in ee bed sleeping and de result would have been de same. De Yarde Fowl woulda win anyhow. He learn from de best—Burnham. ‘De more you look de less you see and de less you see is better fuh me’.
Imagine, India got 1.4 billion people and dem election results does come up in days. Patrick de Yarde Fowl election tek one hour to vote and nearly one year to get de results.
That is because de votes had to get launder. Now SOCU got to probe vote laundering at de PSU. That is why Patrick de Yarde Fowl was nowhere to be seen on Labour Day.
He didn’t go to de union hall and he didn’t tek part in de Labour Day parade.
Talk half and don’t ask who seh Patrick de Yarde Fowl like Mugabe. Dem just as old.