Dem boys seh…Peeping Tom peep once too many

August 24, 2013, By KNews, Filed Under Dem Boys Seh, Features / Columnists, News, Source

When Peeping Tom start fuh write fuh de Waterfalls paper nuff people start to ask who is Peeping Tom. One man put a spy fuh find out who is this person. Some people even corner dem reporters and promise dem a lot of money if dem can tell who is Peeping Tom.

Imagine Ah Kneel ask Uncle Adam fuh tell he who is Peeping Tom. Uncle Adam ask he if he could keep a secret and he seh yes. Then he lean over. Uncle Adam simply tell he that he, Uncle Adam, can keep a secret too.

Even Bharrat call de Waterfalls boss man and ask he fuh tell who is Peeping Tom but de boss man smile. That was de biggest secret in Guyana till de other day. De same Waterfalls paper let out de secret and all because Peeping Tom end up doing wha he does always do.

He use to wuk at Safari Inn and according to de Boss lady he would pull a ladder and peep dem couples who use de hotel. Well dem boys seh that he peep one time too many and he fall. Dem boys seh that de fall was unexpected because it was something he use to do all this time.

It had to be that he either didn’t fix de ladder good or he get too caught up in what he was peeping. Anyhow, it cause some problem at de Waterfalls paper. De Boss man had to find another Peeping Tom. It wasn’t easy.

Now dem boys hope that this one don’t go and kill heself by doing de same thing wha de other one do. After all de Waterfalls paper decide to pay he better than it use to pay de other one.

But even then, de boss man ain’t telling people who is this new Peeping Tom.

Talk half and don’t try fuh find this other Peeping Tom.