People cuss de wrang Nutten
Aug 30, 2016 , http://www.kaieteurnewsonline....uss-de-wrang-nutten/
Is not one dog name Pompey, but when one Pompey get a bad name is all of dem other Pompey does get de same bad name. Hap New hold its Congress over de weekend and dem had elections. De last time dem had elections was a big challenge fuh de leadership of de party.
De man who does wear kickers and couple others challenge Soulja Bai fuh de leadership of de party. De others drop out, but Mr Kickers fight like de devil. When de results announce Soulja Bai win. That was a congress like a general election. Soulja Bai colour was green and Mr Kickers colour was blue. Both sides had supporters wearing dem leaders colour.
People still talking bout dem elections. Winston Murray was de one who was mekking a run fuh de leadership, and that is how Mr Kickers get in.
When Winston dead Soulja Bai step in. Anyhow, just like wha de PPP ask when it lose de big one, Mr Kickers ask fuh a recount. He get de recount and he still lose. Dem boys did expect him to challenge this time, but he didn’t even try.
But dem had two Nutten. One of dem in trouble wid de bond. In fact de elections was about bond. Dem had James Bond and dem had Bond Nutten. De odda Nutten challenge fuh de Vice Presidency and win. Right away people start fuh talk like if is Bond Nutten was de one who get elected Vice President.
People start fuh cuss Hap New. Dem want to know if dem was promoting Bond Nutten. And to mek matters worse, de man who seh he got de bond tun up and sit down in de Congress. Somebody invite him and dem boys would like to know. One man seh is Bond Nutten because he did expect de Congress to discuss de issue and Larry woulda step up and defend him.
In de end was de wrang nutten and all de cussing was fuh nutten.
Talk half and remember is more than one dog name Pompey
