People trying to sweeten oil deal wid salt
Mar 08, 2018 , https://www.kaieteurnewsonline...n-oil-deal-wid-salt/
The same people who are like candy to our eyes can be poison to our hearts. Study their ingredients before feeding dem your soul.
Dis is true fuh dem politicians wha we got. When dem come and talk nice before elections you eye does light up when dem seh dem is better than sweet plantain. Dem is like candy to our eyes.
Is de same thing wid people who meeting each odda fuh de first time and falling in love. Dem gyal like to watch a nice man and dem does dream of waking up next to dis nice man in dem bed.
Men is de same thing. Dem does see a pretty woman and dream how dem always waking up next to dis pretty woman. In both cases de partner is like candy to de eyes.
But after couple morning, when you get to know dem and see how dem operate, you does get so mad dat some people does get bun stomach.
De Guyanese people feeling de same way. Dem feel let down and dem got bun stomach when dem see wha Exxon drop pun de politicians and dem accept. It poisons de soul of every Guyanese.
Dem boys seh right now dem have politicians who swearing dat Exxon is de best thing dat happen to Guyana. Dem talk about getting rich and dem eyes lighting up every time dem hear bout oil.
Soulja Bai and ee son-in-law; Harmon and ee brudda-in-law, Moses; Greenidge and he panda-in-law, Trotty, Ram Jattan and ee uncle-in-law Jordan, mess up de oil deal and now trying to sweeten it wid salt.
But is only time before de people get vex and start an uproar in dis place.
A lot people when dem hear bout de oil find begin to dream how dem gun live like de people in Saudi Arabia. De reality gun be something else.
Jagdeo is one man who dreaming bout de oil money. Dem boys believe he get some already which sweeten him and he waiting fuh more. He extremely silent at dis time.
Talk half and don’t mek you eyes light up too much.
