Ever since God mek man and woman, human beings start to blame one another. That is why de good book seh people must tek de beam outta dem own eye before dem can see good fuh tek de mote outta other people eye. In de Garden of Eden, Adam eat de apple and he blame Eve fuh pickin it. But Eve nevah hold Adam mouth and squeeze he mouth fuh bite de apple.

De other day a Canadian wasn’t seein good. She come to Guyana and de sun was too bright fuh she. She almost get blind when she land at Timehri. And on top of that, she come wid a old eye problem that plenty Canadians and Americans have – she had a big beam in she eye.

Even if she didn’t believe in de good book, she coulda go and see a eye specialist. Dem woulda tek out de beam and give she sun glasses fuh Guyana sun. She come till to Guyana and see corruption, but she couldn’t see corruption in Canada, which is higher than Guyana in de corruption list.

But Guyana got people like that too. Guyana got it own Adam like de one who point finger at Eve in de Garden of Eden. Guyana  Adam quick fuh point finger too. Guyana Adam is a leff-leff soup drinker who callin other people soup drinker. When people use the phrase soup drinker, Adam name does come to mind.

Guyana Adam drink so much leff-leff soup that even he belt does can’t buckle. Guyana Adam does bend down, but he can’t reach fuh tie he own shoe lace, all because of leff-leff soup. Plus he can’t see certain tings whah deh below he belly. Guyana Adam bottom black and he tellin people how dem bottom black, just like whah pot tell de kettle.

Ting-a-ling-a-ling…friend tell friend…mattie tell mattie! Guyana Adam been drinkin leff-leff soup since Burn Ham and Height Man days. Then he drink more soup at Slime News. Now he drinking de mud paper man soup. Guyana Adam drink so much soup that he now talkin sheer poop!