Dem boys seh…Rob Bert mek Donald buy car without licence fuh drive
Brazzy use to go to church every day. He was showing how holy he was. He did trying fuh bribe God fuh all de wicked and wrang things he do to de poor people of this country.
But de people in de church start fuh read dem boys seh and start fuh watch he funny. One old lady decide to ask he if is he dem boys does talk ‘bout and he start fuh sweat. He get shame. He even lose some weight.
More people start fuh ask he if is he name Brazzy, because he does use another name in de church and that put he under more pressure. He start fuh sweat some more and he lose more weight. Next thing dem boys know is that he stop going to church. The Catholic priest going home by he now.
De priest and de same Brazzy does go in de Park. Dem boys know that it can’t be to run. Run and Brazzy is like oil and water. Dem don’t mix.
And talking about water, CGX did find water instead of oil. That bring shame pun de government because Uncle Donald put de cart before de horse. He tek lead up from de Rob Bert and open a workshop. De workshop was to train people fuh oil and gas.
De same day he open de workshop CGX seh dem nah find no gas and no oil. CGX seh that Guyana only got water. When Donald hear only water he start fuh cuss. He seh that he nevah want water. He seh that water is fuh Rob Bert and Kwame and Irfaat and de Rat and Bobby. He seh is dem bring CGX and cause he, Donald, fuh build up he hopes.
Dem boys seh de training before dem know if Guyana really got oil is like buying a car without having a driver’s licence in hand and don’t even know if you gun pass de driving test. And you done pay de insurance, de fitness and de licence. In short, is like putting de cart before de horse.
Dem suh stupid, dotish and scampish that dem got Chinee people coming till to Guyana fuh put in bids fuh rob de taxpayers. De Rat did plan a water programme fuh Linden before he lef office and he plan how much gun go in he and Irfaat pocket.
Dem boys see how Uncle Donald does follow all dem programme like how a blind man does follow a dog. One Chinee company name Jamsoup, put in a bid fuh US$75 million fuh fix back de water properly in Linden. Another Chinee company name China Light put in a bid fuh US$9 million fuh do de same wuk. And some Guyanese put bids lower than US$9 million.
Now dem boys a watch fuh see when dem gun give Jamsoup wid de US$75 million de contract.
That is wheh de big kickback deh. And since de Rat, and Bobby, and Irfaat and Rob Bert and de other Bees plan fuh continue wid dem kickback business, de Waterfalls boss man buying some dankey. Everybody know that dankey does faat, sh.t and kick a..
Talk half and kick dem a..
