Dem boys seh … Robeson lock up a man fuh nutten
Poor Donald. He seh that he ain’t getting a chance to prove that he can run de country. He seh that every time he try something is opposition. De man like Brumell fuh de Police Commissioner and he talk to Granger. But because he come up wid de idea Granger ain’t listen to he suh Brumell had to act fuh a whole year.
De thing when it come through mek de man cry. Dem boys seh that he cry because Henry Greene ain’t deh round fuh see how he tun out. And if wasn’t fuh Donald he wouldn’t a get de commissioner wuk.
Donald mek some other changes too. He change Kwame from being a spokesman but he had to wait till Kwame get sick. Dem boys seh that he gun change Brazzy too and that easy because Brazzy sick, too. Gee Nah gun get a new boss because Knee Ass sick too. Is only when people sick Donald can change dem. He still ain’t do nutten to Martin although all de evidence point to Martin thiefing. Perhaps if Martin get sick then he gun tek action.
That is why dem boys seh that Donald got belly but he ain’t got guts. That is why he don’t walk close to li’l children. Dem same li’l children like play wid pin and it ain’t gun be easy fuh one of dem bore he. Brazzy just like that; that is why Donald run to defend he because as everybody know de birds of a feather saying. But he got to explain wha Brazzy mean wid de advertisement that he put out. Instead of explaining de situation Brazzy confuse de situation even more. Now dem boys want to know wha he mean when he explain bout de Marriott.
And dem boys want to know why Robeson mek de police lock up a man because de man tell he that he party gun lose de next elections. When de police ask Robeson why dem have to lock up dew man Robeson tell dem that he is de Minister and he ain’t got to mek a report. Donald ain’t dealing wid dem things. Talk half and hope Donald change.
