Rum Jhaat don’t like when people pull out from he
Pull out and kick out is two different ting. One is done by yuh self when yuh don’t want some ting no more. De other is done by other people when dem don’t want yuh no more. Some people does pull out if dem know dem gon get kick out. And some people does get kick out before dem could pull out. But not every body like to pull out. Some people rather wait till dem get kick out.
Rum Jhaat and de KFC always involve in some kinda pull out or some kinda kick out. Rum Jhaat seh he pull out from one party and start another party. When de truth buss out, every body know he get kick out from de fuss party. Another one who get kick out not too long after also bluff and tell people he pull out.
From then to now, is de same kick out and pull out problem Rum Jhaat havin. He nevah like when any body pull out from he. De other day No Gel Hugly seh he gon pull out from Rum Jhaat after de people who does pay he big money pull out from he.
But Rum Jhaat don’t want No Gel to pull out. After all, de two of dem doin de same ting pun de inside and collectin de party money pun de outside. De party shoulda rename itself money party like how Mayweather call he team money team. Just that Mayweather fightin fuh he own money and de party people tekkin other people money.
Ting-a-ling-a-ling…friend tell friend…mattie tell mattie! Now one set of people from overseas find out and dem pull out every ting from Rum Jhaat. Well Rum Jhaat like dem so much that he plannin to go all de way overseas fuh beg dem to put it back in!
