Somebody playing hanky panky wid Labba Lip
People beginning to see this new govt just like how dem use to see de West Indies cricket team back in de days when dem never beat anybody, not even demself. This new govt ain’t jailin’ nobody, not even demself.
A old time US President, John Adams, did tell dem boys, “In my many years, I have come to a conclusion, that one useless man is a shame, two is a law firm and three or more is a government.”
This really sound like Guyanese. Dem boys know a lot of single useless men. Berry Berry, Kwame, Irfaat, and Jagdeo are just a few.
When it come to law firm, dem ain’t calling nobody name because dem ain’t able wid another lawsuit. But three-quarter of de Guyanese know all of dem who only know to rob you.
As for de governments that been running Guyana fuh how long, don’t ask how many useless and senseless SOBs sat in de Parliament and mek decisions to fatten dem pockets and lef de country piss poor.
Yet this govt ain’t jail nobody. Instead dem playing hanky panky wid people like Kwame.
Cement pocket get fatter than a cat. He mek everybody who come in this country from wheh ever a citizen. Dem come in today and get Guyana passport de next day.
Dem boys ain’t calling no nationality name because dem fed up hearing people telling dem that dem racial. Some seh dem boys don’t like foreigner.
That is not all Cement use to sell. Dem boys hear ee sell firearm to anybody and anything once de price right.
Irfaat is de other one who fatten he pocket plus he belly. De US embassy intent to mek him reduce. Dem tek way ee visa. He sell land to anybody once de price was right, especially overseas Guyanese. He rob dem blind.
Well as fuh Jagdeo, he sell out so much that if dem boys got to write, it gun tek dem another 23 years of newspaper to write a knnn of de amount of wrong things he do to de Guyanese people.
He sell out almost everything what is other people own but when it come to selling his things he does only bluff.
Dem boys did question him bout de big $100 million chandelier wha deh in he house. He bluff and seh he ready to sell fuh $2 million. When dem boys present de money he raise to $5 million.
Dem boys ask how he want de money and he never answer on to now.
Dem boys still have de $5 million to pay fuh de chandelier because dem want it to nice up de Waterfalls paper building.
All of dem should go to jail.
Talk half and hope somebody beg Jagdeo to sell.