Somebody playing wid Donald election
“They got a snitch in GRA. If I fart de people at Kaieteur News know.” That is wha Khurshid Sattaur seh when a reporter call and ask he bout de charge wha he get some lawyer to file gainst de owner of de Waterfalls paper. He is he own snitch; that is wha dem boys seh.
Bright and early Sunday morning dem boys hear how de Waterfalls boss man get charge fuh tax fraud. The headline sound powerful suh dem boys contact dem lawyer to find out wha really happen. One lawyer still laughing and de other one get lock jaw.
“What fraud? Who commit de fraud?” Dem boys decide fuh check de law and is then dem realize how wicked people can get. De law seh that if a man entitle to duty free concession and he apply and get it he ain’t commit no fraud. De law also seh that de man ain’t got to buy de vehicle that he importing. In fact, de lawyer show nuff thing.
Dem boys seh that somebody run to talk bout criminal charge because de government want to hold on to the vehicle. De Chief Justice was going to release de vehicles on Monday suh GRA run and file de criminal charge de Sunday. Is wickedness and since dem people got friends and family somebody mekking sure that Donald lose political support. Friends and family does stand together and wid GRA spiting people dem same people gun get vex wid de government.
Dem boys can’t talk bout Khurshid Sattaur because he sue in he own right as a private individual but dem can talk bout GRA and de head of GRA. De head of GRA ain’t sue nobody. Of course, dem boys seh that de case gun be like de one wha Jagdeo run and sue Freddie. Nobody can’t remember de last day de case call. Fuh sure, Jagdeo never go to court fuh represent heself.
De same thing gun happen in this case because Anil seh that he ain’t got nutten to do wid this. Khurshid will not even go near de witness box because he is a man who does get confuse quick and dem lawyers waiting fuh he. And same way how dem lawyers waiting dem reporters waiting. Hospital people gun be waiting too, some of dem wid a straight jacket.
Talk half and watch how de wickedness gun play out.
