Soulja Bai asking thief man to help solve crime
When people getting old all kinda thing does happen to dem. Some does get poely, some does lose dem eyesight, some don’t hear and some does get forgetful. A few does go out dem head and dem boys want believe that Soulja Bai is one of dem. He asking de opposition to help he fight crime. And look who he ask… Jagdeo who suppose to be behind bars de minute de government change. He shoulda been like de man from Guatemala. Dem boys seh that when Soulja Bai ask Jagdeo fuh help him solve de crime, sugar and rice situation, it is like asking thief man fuh help solve thiefing problem. De crime didn’t start overnight. It start wid Jagdeo and grow into a monster. Everybody at de top start fuh thief and dem knock off de people who talk. De auditor talk bout de thiefing at NDIA and he get knock off. When dem boys ask Soulja Bai wha going on, he seh what people thiefing now is scraps wha Jagdeo and he kavakamites lef. That is why he want engage dem, not to ketch thief man but fuh dem to put back wha dem tek. Dem boys hear de police going after de Pee Ess who get knock off de other day. Dem hear ee got restaurant in Berbice and a big fancy house like Jagdeo own. De new govt want to know wheh he get money to build that. Dem boys want this new govt to tek a leaf out of FIFA book. Only de other day de FIFA body seh plenty people more got to be arrested. Dem seh de investigation might tek years. Dem want get down to de bottom and mek sure that this never happen again. Dem boys wish Soulja Bai can do de same thing and continue de forensic audit so that not only one Pee Ess can get fire, and one contract get tek way but all of dem who involve and who grab de hog of Guyana must end up in jail. Dem boys want Babbie and Jagdeo end up in jail here, not in Uncle Sam and Ashni, Brazzy, Irfaat and Rob de Earth and de rest of de Bees must join dem. Talk half give Soulja Bai Dr Chase memory pill.
