When a man want get somewhere he does promise de moon and de star. He see a woman he does promise she everything de sun shine on because he want something. Politicians is no difference. In fact dem wuss. Dem does promise wha de sun and de moon does shine on.
Was a lot of talk before de election about corruption. Dem mek nuff promise how dem gun clean up de place and how dem gun set a lot of example. De dem was carrying on people believe that de prison woulda been full de next day and dem would have had to beg Trinidad and Suriname to fuh hold prisoners fuh we.
Dem start wid investigation all over de place. Investigation done and a lot of jailing recommend plus de people recommend new systems and procedures to straighten de lawlessness that Jagdeo and Donald Dumb introduce to Guyana.
Not one thing ain’t happen and six months done gone. Soulja Bai and he kavakamites dem ain’t even open one of de report. De big question that ringing in dem boys ears and got couple people whispering pun de road if dem get pay off already.
De way Jagdeo and he kavakamites dem carrying on you would want to believe that dem was living wid de pope in de Vatican and singing hymns.
That is why some of dem end up wid karaoke set and deh singing at places like Sleep Out.
Imagine dem own, member, who was a senior man in de PPP party describe dem as being de most corrupt govt in de history of Guyana. Nutten can beat that.
Dem boys know Rum Jattan got problem wid he eye, Moses got a some loose screws, Soulja Bai does walk slant, and Li’l Joe start fuh stamma but that shouldn’t stop dem from jailing Jagdeo and he kavakamites, even if de defaamity dem got, get wuss.
Talk half and hope that people bring more pressure on Soulja Bai to jail dem criminals—people like Neaz, Kwame, Brazzy and Marcie.
