Soulja Bai gun be de worse president Guyana ever see
Feb 20, 2018 , https://www.kaieteurnewsonline.../02/20/afcs-dilemma/
Soulja Bai got to fix dat one-sided oil contract. De people of Ghana vex although dem get 10% royalty. Dem suh vex dat dem planning a massive protest to get more than dat 10%. Dem also describe dat contract as de worse oil contract sign anywhere in de world.
Guyana get 2% and de people of dis country look like if dem fall in a coma. Dem ain’t seh word; not a word from anybody except Chris Ram, Rambo Gaskin, Nigel Hinds and of course, de Waterfalls paper.
If de people of dat African country seh dem contract is de worse in de world, how you describe Guyana own? Soulja Bai got fuh answer dat question and he got to do so fast.
Dem boys seh if he don’t deal wid it quickly, he will go down as de worse president Guyana ever produce. He gun get cuss from his own children and grandchildren. Dem people children gun cuss him and dem boys children and grandchildren gun go to he grave and cuss him right deh.
Everybody know when a nation suffer from a bad deal. Nobody does forget de people who put dem in de dilemma. Dem boys seh, he don’t have to worry dat dem gun plug de well and go away.
Dis is not about tomato, mango, orange or bygan wha does rotten. De oil been deh from de beginning of mankind and Guyanese ain’t dat hungry. All dem begging you for, is to mek sure Guyana get a fair share of its wealth suh dem don’t have to live 40 years from now, de same way dem living today.
Talk half and tek note of Ghana.
