Soulja Bai nursery school kit and a laptop same price
Mar 04, 2018 , https://www.kaieteurnewsonline...a-laptop-same-price/
Jagdeo was the king fuh conning, misleading, outsmarting and lying to de nation.
Dat brute con de whole country in the Marriott, Berbice bridge, airport expansion, Skeldon plant, Enmore packaging plant, cable from Brazil, cable across the Demerara River, Sanata complex, and every big project.
If dem boys didn’t stop de Amaila Falls project he woulda got dem and generations to come paying through dem behind.
Dem boys want people to remember de one laptop per Family project. Jagdeo put aside US$27 million. He seh he want to give every family one laptop. Dat was another con. De US$27 million and more vanish and de families still dumb because dem never see de computers.
Many kackish things happen under him but as dem boys seh de longest rope has an end. De jail door watching him and his kavakamites.
De same stunt he pull wid de one laptop, de Education Minister pulling wid nursery education. She seh she put aside $144 Million fuh buy 1500 nursery school kits.
Dem boys want know if de kit got a computer inside because dat kind of money can pay fuh dem children education to University.
The same thing wha happen wid the one laptop per family happening here all over again. De money gun end up in dem education people pocket and the kids gun be more dumb come next year.
De only difference, today, is de $144 million would not end up in Jagdeo pocket.
Then dem boys see de people at the Ogle airport trying de same thing. Dem and all trying to mislead Guyana just like Jagdeo, dat scamp.
Dem get a Kit, not de nursery school kit, who would give away anything fuh a few dollars, even wha he own or wha he got, to mislead Guyana.
Dem seh no tax dollars spent on the development of dat airport. Yet de evidence show dat de poor man money spend and continue to be spent pun de airport and only one set of people benefitting.
De poor people paying fuh de police, de immigration services, de fire service de air traffic control, Customs and a number of odda things dat cost hundreds of millions when de month come.
Yet dem got de nerve to tell people how de airport private. Dat is conning, misleading, lying and outsmarting.
Talk half and expose all dem con artistes and crooks.