Soulja Bai starting a circus
Sep 09, 2016 , http://www.kaieteurnewsonline....i-starting-a-circus/
It look like if it is every day that de government starting a circus. When you go to a circus you does see nuff somersaulting. Even de clowns does flip and flop all over de place.
Yesterday, de Waterfalls paper report how de government appoint a convicted fraudster to serve as ambassador to Kuwait. This is a man who help de company he work with to forge financial records and fool de U.S. Securities and Exchange Commission.
When he appear in front of de judge he wipe he mouth clean and then run to Guyana because he couldn’t get any work in de States. He couldn’t even vote there. He didn’t expect to get ketch. But is de man who appoint him. He claim how he check.
Dem boys want to know how he check.
Now Kickers Carl seh he gun mount an investigation. He don’t have to investigate nutten. De Waterfalls paper direct him to de information but he telling people how he can’t tek a newspaper report. But he boss tekking dem same reports seriously.
Dr Nutten tie up a deal wid Larry fuh a storage bond. In two months ee pay Larry de money Larry spend to buy de bond. Dem boys kick up a fuss. In fact, dem mek nuff noise and dem didn’t stop until Soulja Bai order a probe.
Old people always seh you don’t ask de devil to try case in hell. Soulja Bai select three of ee own people and when dem done dem seh how Nutten didn’t do nutten wrang. De amount of noise dem boys mek send Soulja Bai to somersault. He now seh how Nutten shouldn’t have rent de bond and that de deal was bad.
“Cabinet has concluded that the arrangement was undoubtedly undesirable. Cabinet also considered the options and recommendations in the report of the Cabinet Sub-Committee tasked with reviewing the decision of the Ministry of Public Health to lease facilities at Sussex Street.” That is wha dem send out.
All it mean is that dem done wid de bond deal, but nobody ain’t seh if dem gun tek back de money from Larry. Dem boys looking at that.
Talk half and look out fuh more somersaulting.
