Soulja Bai treat BK like a yo-yo
March 30, 2016 | By KNews | Filed Under Dem Boys Seh, Features / Columnists, News, http://www.kaieteurnewsonline....eat-bk-like-a-yo-yo/
When people stay off de job dem does get dem letter of dismissal. When dem do wrang thing like thiefing, dem does get knock off, too.
Forestry and Housing people get letter of dismissal fuh something wha everybody know dem do. BK ain’t do nutten and he get knock off yesterday by Soulja Bai. Dem boys seh although people tell Soulja Bai that BK deh in China wid Li’l Joe transacting business fuh Guyana, Soulja Bai tell dem to fire him.
BK and de same man who appoint him, Li’l Joe, was in de air heading to Guyana when dem get a phone call that BK is no more a business adviser. Soulja Bai even lef instruction at de airport fuh tek way his diplomatic passport that Li’l Joe authorize.
This is a very funny world. This man was appointed and Soulja Bai didn’t know. Dem boys hear is that Sandra gyal pick up de Waterfalls paper and shout, “You so and so stupid? You fuh real? How you could put BK as business adviser?”
Soulja Bai ask, “Who BK?”
She seh, “Is how much a dem you know in Guyana?”
Is then Soulja Bai call Li’l Joe pun de plane and ask him, “Wah de so and so going on? You mekking people business adviser in secret? Well I gun fire him in public. “And when you come back I gun decide wha to do wid you.”
One man seh that BK get like a yo-yo; one letter in and one letter out.
Dem boys hear Sandra gyal tell him Jagdeo use to operate in secrecy and how he, Soulja Bai, did tell de nation how nutten will happen in secret under his presidency.
She remind him, he also promise de nation to tek back every inch of Guyana, be it on land, air or de sea, that Jagdeo tek fuh heself, he friends, he family plus de Bees, including that same BK get.
Dem boys seh dem like how he act here but he moving very slow on de audit reports that reveal skullduggery to de highest order.
Talk half and watch how Li’l Joe trying to comfort BK.
