Soulja Bai want some turpentine
Jul 15, 2017 , http://www.kaieteurnewsonline....ant-some-turpentine/
Old people had a way of talking when dem didn’t want li’l children understand wha dem was saying. Same way dem old time people had a way of talking when dem didn’t want Massa understand wha dem was saying.
When dem boys was talking dem always believe that is only de local people gun understand wha dem was saying. Well couple well shock dem. De embassy people and dem from de high commission understand every word wha dem saying.
Last night, Uncle Sam was celebrating another birthday. He is a big boy and every birthday getting bigger and bigger. Long time it use to be held at de Ambassador house, then it change to de embassy. Now de people got to rent a hotel.
In he speech, Ambassador Holler Away shock dem boys when he mek everybody know that he understand wha dem boys saying. He pick out something dem boys seh and remind people that Uncle Sam don’t control everything in Guyana.
And that come about because dem boys had nuff thing to talk about ExxonMobil which can control all dem politicians in Guyana and when ExxonMobil talk is like de whole of America talking.
But when de dust settle, dem boys don’t mind Uncle Sam controlling some things. Dem want it control de jail when some politicians end up inside. Some people seh that Soulja Bai acting too slow. If he was acting fast, he woulda done got Jagdeo, Brassington, Ashni and some others inside Camp Street.
Today is he birthday and dem boys wish somebody give him turpentine by he soft spot fuh mek he get some speed.
Imagine what would have happened to dem three if dem been inside last Sunday.
Is now dem boys understand why Ashni and Brassington out of de country and Jagdeo always jumping pun a plane every time, he smell a rat.
Dem boys seh that dem got a sneaking suspicion about de reason fuh bunning down de prison was because de idea was to mek sure dem don’t have no prison. Well, somebody got a rude awakening.
Talk half and hope somebody rub some turpentine by Soulja Bai tail.