Some people cutting spike nail

Whatever do in darkness does come to light. No matter how people try to hide dem does get ketch. Some people thief and believe that dem smart; dem get ketch. And is not only people in Guyana think so.
Dem boys remember Bernie Madoff. He was so smart that he now spending de rest of he natural life in jail. Then dem had de one from Antigua who put money in cricket like if rain falling. He and all spending de rest of he life in jail.
Dem got de set in Guyana who do de same thing, but nobody ain’t want to put hand pun dem. Of course, when Donald lose de elections some of dem nearly get heart attack, because dem know that nuff thing woulda come out.
That is why Soulja Bai start de audit and de audit find nuff missing money, but that is only de tip of de iceberg. As dem boys seh, money is one thing, life is another. When Jagdeo been in power some of de people who use to hang around him believe that dem was bigger than anything pun de land. People use to walk and threaten other people wid gun and de police never charge dem. All of dem was big ones.
De other day de police pick up one of dem same big ones. This is de first time he ever get pick up. Dem boys seh that right away de news spread through de gang. Fear does do plenty things; it does loosen bowels and it does also tighten bowels. Last night dem boys hear that some of dem was cutting spike nail while some was washing de streets.
One man actually call Jagdeo to complain how names gun call. That was when Jagdeo seh that he don’t know nutten, and he never order nobody to do bad things. Then de man seh that one of dem in custody can’t bear pressure.
Talk half and wait fuh de squealing.