Trump, Jagdeo and Kamla is de same peas in a pod
Mar 15, 2018 , https://www.kaieteurnewsonline...-same-peas-in-a-pod/
Donald Trump is a man who don’t keep staff long. Dem boys remember Kamla Persad-Bissesar. She was like Trump. Since anybody slip is fire dem get fire. She fire 13 Ministers in a year, which wuk out to at least one a month.
Well dem boys finding out that Trump beat she. He fire almost 30 people since he tun President a year ago. De odda day he fire Tillerson. Tillerson was a man who was a big thing wid ExxonMobil; that is de oil company that drilling fuh oil in Guyana.
Dem boys seh that Tillerson woulda deh good wid Exxon, but he get call, and since everybody want walk wid Presidents and prime Ministers, Tillerson lef he good, good wuk and go wid Trump. He was a big thing wid he name in de news every day.
He didn’t bargain fuh Trump. From de time anybody start to get popular, Trump does fire dem. That is wha happen wid Tillerson. Is de same thing happen to couple Attorney General and some investigators.
From de time de news break, Exxon send a sympathy cable to Tillerson.
Dem boys want to read de cable. Soulja Bai is de only one who don’t fire nobody. Dem boys notice that he ain’t got good people in de first place.
So when Rupert get sick and announce how he want retire. Soulja Bai ask him if he mad. He insist that the man must come to wuk every day. Rupert nearly get lost de odda day because he couldn’t find de office.
Sunday dem had a ceremony at Babu Jaan. Jagdeo was de main speaker. Dem boys want to know if he is de only person who could talk in de party. Donald Dumb don’t talk; he does write letters in de press.
De speech last one hour because people was walking away. This year dem didn’t have GuySuCo truck to help transport people and dem cane cutters was not paying to go. Jagdeo coulda pay all of dem passage, but he cheap and selfish.
Dem boys seh is a good thing nuff people didn’t go, because all Jagdeo coulda talk bout was Freddie Kissoon. Is when he nearly done talk he remember Papa Cheddi.
Talk half and watch de stupidness that going on.