People who like to do tings in secret does always get expose. Freddie Kissmansoon thief books and get ketch. He thief books in Canada, he get ketch. He come back to Guyana and thief books again, and get ketch again. De Man Kisser does play like he is a angel, but when de truth come out, he more dutty and wicked than de law allow.

Dem is de kinda people who old people does call two-face. Some two-face people does look good and sound good – not Freddie though – but dem evil pun de inside. People like Freddie ain’t got no shame. That is why dem had to pull he out from UG.

And talkin bout pull out, a big KFCite, who was also tryin to do tings in secret, had to pull out. In fact, No Gel Hughly seh he pull out from all politics. But de only ting he was in was politricks, because he had plenty tricks up he sleeve. Or so he did tink fuh a long time until he get ketch.

He stay in so long that he get ketch pun de inside while he was in de thick of tings . Ah old man seh No Gel need to learn when to pull out, or he gon always get ketch inside. Well, now that Sithe Global pull out from de hydro project and also pull out from No Gel, no body know what No Gel gon do. De same old man seh No Gel like to have tings inside.

Ting-a-ling-a-ling…friend tell friend…mattie tell mattie! And now that all this pullin out tekkin place, one security man who like to talk plenty decide he ain’t tekkin chance. He decide to pull out security guards from de guvament. Talk about pullin out de wrong ting!