Dem boys seh… Wife pay fuh kill sweet woman
October 4, 2013, By KNews, Filed Under Dem Boys Seh, Features / Columnists, News, Source
When people talk bout stupidness dem know wha dem saying. A lady find out that she husband enjoying de arms of another lady. Instead of dealing wid de husband this woman decide that she got to remove de problem suh she decide to find somebody who gun remove de problem.
How this woman find a woman who claim that she can kill de sweet woman is a mystery but she find somebody. Then dem boys hear bout de stupidness. De wife promise de woman some money fuh do de job. She ain’t advance no money or nutten. This other woman got to be stupid because she tell she neighbor that she got a wuk and that he gun get a share of de money.
Well de long and short of de situation is that de hired woman and she neighbour tackle de sweet woman and dem stab she. When she start fuh holler dem run away. De killer woman hide in a bush. But dem ketch she and cuff she pun she mouth. Then dem tie she up like a pig ready to get roast.
De thing that got dem boys wondering is how people can kill somebody dem don’t even know and never had a problem wid. In war is a different story but in ordinary life is only dem bandits who guh to rob people does do that kind of stupidness.
De other piece of stupidness is that de woman who hire de other one gone and hide. It mean that she got to lef she warm bed and sleep like a cat, peeping out of one eye every minute. But dem boys want know wheh de husband. Some believe that de woman kill he too. Suh she hiding, she husband missing and de sweet woman in a hospital bed.
Dem boys ain’t laughing too hard because dem got wife. Dem ain’t boasting because dem can’t swear fuh one another but then again dem women does hear all kind of thing and some of dem stupid enough to act pun any rumour.
Talk half and watch out fuh stupidness.