Yuji Happily Pumping
Dem boys seh…
Ram Sammy can’t find de pump
There is an old saying that thief from thief mek God laugh. De same thing mek Satan cry. But dem boys seh that three Trinidad thief man mek Bobby de earthly Satan, get diarrhea.
He wake up Monday morning and he get de news that some Trini thief ee binni plus cash. Dem boys gun pray that people continue to thief from he and all de Bees. And dem nuff and dem got nuff nuff.
This list include de Hana Rebel, Rob de Earth, Irfaat and de Shaat scamp. Brazzy, that fat crook, is a Bee and he got li’l less than de Rat.
Rob de Earth tek plenty money fuh buy nuff pump from India. Donald move he de same time and put Ram Sammy fuh deal wid de pump. But he need a good pumping heself.
Rob de Earth de young and he been pumping from small. Everybody know that. Tool See, de pump man, teach him.
Now Ram Sammy mek people believe that no pump nevah come. He buss dem bag suh dem boys want to know wheh de pump money deh—wheh dem pump all de money.
Ram Sammy also got to talk bout de Skeldon money and de Enmore money and de Hope Canal money. He wasn’t there when none of dem thing start build but since he tek over dem still pumping money into all.
Dem boys seh that nuff of de money don’t even guh wheh it suppose to and wid all de pumping people in de loop does collect.
Ram Sammy know that he can’t pump but he singing. He start a nice tune bout dem pump. One time he claim how de pump coming pun a barge and going to Patentia. Now he singing that de pump never come.
When de money deh? And Is nuff, nuff money.
Talk half and look fuh dem pump man from India.