Skip to main content

Chicken is now Mr. Chicken!

Oct 16, 2022 Dem Boys Seh, Features / Columnists, News --- Source --- https://www.kaieteurnewsonline...n-is-now-mr-chicken/

Dem Boys Seh…

Kaieteur News – A fowl walk pass dem boys de odder day. As it was passing, it stop, cock it neck proudly and den turn it head in de direction of dem boys.

Dem boys had to look away. Dem could not stare de chicken in it eye. Because chicken now is Mr. Chicken and dem chicken turning dem noses up pon people dese days.

Chicken price now outside de reach ah de poor. Is now more dan $400 per lb pluck weight. At dat price, dem chicken can mek styles pon yuh.

De Prezzie did claim dat how we can be producing we own broiler chickens and mekkin we own feed. De man never promise dat chicken gan be cheap. But dem boys never expect dat de price woulda jump suh high. Dem seh is supply chain crisis. But dem boys wan feel is greediness and exploitation wah cause de price fuh guh suh high.

Dem boys gan get back even though Christmas coming and money gan come in from foreign. And dem boys gan guh and look fuh de fattest and juiciest chicken and dem boys gan bubble it in curry.

Dem boys gan call dat a chicken curry. And as Prezzie seh, whether is chicken curry or curry chicken, dem boys will be having chicken and curry fuh Christmas. Right now dem boys struggling fuh mek ends meet.

Nah talk about turkey. Or even mutton or duck. Dat outside of de range of poor people. Dem boys can’t afford dat nat even with de $28,000 pension bonus wah dem giving de elderly.

Imagine we ah produce oil and we poor people can’t afford fuh buy chicken.

Talk half, leff half.

Replies sorted oldest to newest

Cheating is problems!

Oct 17, 2022 Dem Boys Seh, Features / Columnists --- Source --- https://www.kaieteurnewsonline...heating-is-problems/

Dem Boys Seh…

Kaieteur News – It used to be a time when de one thing dat people did not condone was cheating on yuh taxes. Nowadays, de mo yuh cheat pun yuh taxes, de more respected yuh does be in society. Dat is how yuh know de world going upside down.

Dem sportsmen cheating. Dem even claiming a man cheating in Chess and dat is not considered by some people as a sport. Dem does call it game.

De Russians dem seh bin cheating by using illegal substances. Dem did even ban dem from de Olympics at one time.  Now we hearing about people getting ban not fuh cheating but fuh not tekkin a test.

A tennis star didn’t get fuh play in de Australian Open because he was not vaccinated. De world going upside down.

But de best is de man wah end up in jail and find out dat he girlfriend cheat pon he. Dat is double loss.

When a man go to jail, he does lose some of he rights. He does retain he right to life but he freedom of movement does be curtailed. He nah enjoy de fullness of odder rights.

But now it look as if when a man go to jail, he losing mo dan he rights. A woman claim how she spouse go to jail and when he was in de lockup, she went with someone else. She claim dat is not cheating, she don’t consider dat cheating because de man was in jail.

So it look as if when yuh get jail, you does lose yuh rights but you better half does get de right fuh go and do what dem want with somebody else. Dat is how dem boys look at it.

Talk half, leff half.


T 20 is nat proper cricket!

Oct 18, 2022 Dem Boys Seh, Features / Columnists, News --- Source --- https://www.kaieteurnewsonline...-nat-proper-cricket/

Dem Boys Seh…

Kaieteur News – Nah bet yuh money pun de West Indies. Yuh could lose yuh house and property and end up like a street urchin. De West Indies is a gamble too good to be true.

Gambling pun T 20 cricket is no sure thing. De dice could fall anyhow. Like with de Amazon Warriors. Dem had nuff people bin think dis was dem year. But de warriors show how easy it is for the tide of fortune to turn. In de case of dem it turn back quickly.

Dem boys rather bet pun local politics dan to bet pun T 20 cricket. Dem boys is one of dem wah nah recognize T 20 as proper cricket. It remind dem boys of one-tip; two –tip cricket wah dem used to play when de small. Was a slugfest and a luck an chance game.

Is de same thing with T 20. Yuh gat to go out with guns blazing. Yuh could get lucky or yuh could fail. Yesterday, de West Indies collapse. De coach seh dem had too many injudicious shots. But dem boys feel dat de nature of T 20 is nat to restrain yuhself. Yuh only gat 120 balls and yuh gat batting down to number 10, so yuh should go out with guns blazing.

West Indies went out with guns blazing and dem come back in with dem head stoop. Dem get bear. But dat is de nature of T 20. Anybody could win on dere day.

So nah judge we boys too harsh. Dem gan win, eventually, but na necessarily anytime soon.

Talk half. Leff half.


De library with razor wire

Oct 23, 2022 Dem Boys Seh, Features / Columnists, News --- Source --- https://www.kaieteurnewsonline...ary-with-razor-wire/

Dem Boys Seh…

Kaieteur News – De National Library in Gee Tee gat security guard.  But dem boys notice how dem put dem put razor wire around de fence of de National Library in Georgetown. It mek de old Carnegie Building look ugly. It sending a wrang message to dem visitors when dem see razor wire around a building in de centre of town and in a place which gat security guard.

Dem boys wan know what is dere to steal in dere. What thief going in dere to steal? Dem thief man nah interested in books. Dem nah even interested in yuh bank book. Dem nah care about yuh books case or even dem pickney book bag.

Dem boys know a man wah did apply fuh a wuk at a security firm. Dem call he fuh an interview. He turn up and dem had he in de waiting room fuh 12 hours. When dem finally call he dem nah ask he no question. Dem give he de wuk. Dem seh he hired.

Dem had a place wah had strict security. It had a bond and every afternoon dem workers wah passing through de gate does gat fuh get check. Dem does gat fuh open dem bags and empty dem pockets fuh mek sure dem nah carry home nothing from de bond.

One of de workers deh with de company de longest. He used to clean de yard. And every afternoon, he does walk out with a wheelbarrow full of all de garbage he collect. Dem guards used to rifle through de rubbish fuh see if he hide any stolen items.

Dem do this fuh twenty years and dem nah find nutting. So after a while, dem leff de rubbish cleaner to walk out with de wheelbarrow and de spade. When he retire, de head of de company hear dat he buy a yacht. 

Years after de boss meet he pon de road and ask he how he could have afforded dat. He explained to de boss that he used to steal a wheelbarrow every day.

Talk half. Leff half !


School sports does attract nuff hawks

Oct 24, 2022 Dem Boys Seh, Features / Columnists, News --- Source --- https://www.kaieteurnewsonline...-attract-nuff-hawks/

Dem Boys Seh…

Kaieteur News – De police gat to start going by de school sports. And nat only fuh deter dem urchins wah want tek way dem lil children cell phones.

Dem boys pass by one of dem secondary school sports. And dem boys notice a lot of young men, driving cars and motorbikes, hanging outside de school sports. But dem was not only hanging out, dem was throwing nice words to dem young school girls when dem passing. Dem boys had to hooller pun one of dem and like he did want square up to fight.

But he know dat he was not supposed to be out there. He out there with leering eyes fuh dem young school girls and dat is why Dem boys continue to insist dat no matter what is de age of yuh child, accompany yuh children to de school sports.

Deh gat some big boys who leff school lang now, who does be like chicken hawk waiting to prey on de ilil school girls. And dat is so shocking and shameful.

De police need to go by dem school sports and be on de lookout fuh all de predators wah does deh liming by de gate and trying fuh form small talk with dem lil girls. De police should ask dem what dem doing dere and wahy dem outside de school sports rather than inside.

We gat to protect we lil children from dese predators in society.  Otherwise is sheer stress and problems gan come we way!

Schools sports does attract nuff hawks. And de most dangerous are de ones on land.

Talk half. Leff half.


Since dat announcement of visa-free travel to UK

Oct 25, 2022 Dem Boys Seh, Features / Columnists, News --- Source --- https://www.kaieteurnewsonline...a-free-travel-to-uk/

Dem Boys Seh…

Kaieteur News – Since de UK announce visa-free travel for Guyanese, many of dem overseas-based Guyanese who living in England start a disappearing act. Dem disappear off of Facebook, dem disappear off Instagram, dem sending less email to dem family and dem mekking less Whatsapp call and sending fewer emails.

Just after de visa-free announcement, nuff local Guyanese suddenly know dat dem gat family in de UK. Dem start fuh call dem up and reach out to them. Dem tell dem family how dem miss dem so much and how dem would like to reconnect.  In fact, dem tell dem how dem planning fuh come to de United Kingdom and dem hoping to be accommodated.

Is den some of dem Guyanese-resident in London decide fuh play scarce. Dem nah answering dem phone. Some of dem decide fuh move out fuh change dem address because dem know dat nuff Guyanese when dem go overseas does go lang hand.

Some of dem wah invite themselves does even want you to pay dem ticket.  Yuh does gat fuh feed, clothe, entertain dem plus give dem spending money and things fuh bring back fuh dem family. And if de weather cold, yuh gat to lend dem yuh winter jacket and scarf because dem does tell yuh plain and straight how dem type of clothes nah sell in Guyana.

And boy oh boy! De amount to things dem does want bring back to Guyana, it can’t hold in dem suitcase. De family does gat to tek dem to a shipping company fuh send de rest of things in barrels. And who yuh think paying for all of dat!

Talk half. Leff half !


To fail to prepare is to prepare to fail

Oct 26, 2022 Dem Boys Seh, Features / Columnists, News --- Source --- https://www.kaieteurnewsonline...-to-prepare-to-fail/

Dem Boys Seh…

Kaieteur News – A COVID wave is coming. The winter season is approaching and with the cold comes a spike in COVID cases and deaths. Dis is what Dem Boys does be worried about because when America sneeze, de whole world does catch a cold.

And de Americans and de Europeans preparing fuh an autumn and winter spike. Dem know when de place get cold, people, like in de days of de cavemen, does huddle together and stay indors more and dat is jus de conditions wah de virus looking for fuh spread.

America preparing fuh an increase in COVID 19 over de nest few months. Once cases rise in Uncle Sam it gan spread to Guyana. Day has been de pattern. So we muss prepare for a wave. Dem old people does sey dat to fail to prepare is to prepare to fail.

But it nah look as if de government prepared. Up to now dem nah advise de population about de third booster shot. Dem bin tell people how de protection from de vaccines does begin to wane after four months. Well is more than 4 months since de last booster shout bin administered and de public nah hearing about another round of booster shots.

Joe Biden, de President of America tek de bivalent booster shot. Dat is supposed to protect yuh against some of dem new variants. Dem boys nah hear whether Guyana put in an order as yet fuh dah new booster shot.

Talk half. Leff half !


Guyana nah learning from odder country!

Oct 27, 2022 Dem Boys Seh, Features / Columnists, News --- Source --- https://www.kaieteurnewsonline...-from-odder-country/

Dem Boys Seh…

Kaieteur News – Yuh does see all kind of things pun de road. But dese days is plenty traffic accidents yuh seeing. And de government nah learning from odder countries’ experiences.

One of de reasons why yuh gat so much accident is because yuh gat more cars. But yuh also gat more people driving and some of dem nah know how fuh drive properly. Sometimes yuh does wonder how de police able to test all dem new drivers pun de road.

Yuh can’t build road fuh tek off de traffic. Every day is more vehicles pun de road. We hear more than 1000 cars done get import in de month of October alone. And as shipping costs get cheaper more and more vehicles gan be added to de fleet of vehicles using de roadways.

Countries like Trinidad should be an example. De  more road and highway dem build, de wuss de traffic situation get. More roads encourage more people fuh buy car. More housing scheme mek thing wuss because people gat to get in and out of dem schemes So is more and more cars getting registered.

De country needs some alternative solutions. One of dem is fuh a light railway fuh move commuters. Some people feel daty along side dem highway dem should not allowing housing and business and instead use de verges fuh an express tramcars system which can transport people.

Barbados nah gat space fuh buoild roads. So dem managing dem traffic better through removing traffic lights and replacing dem with roundabouts.

But nobody nah looking at alternative solutions in Guyana De more traffic is more road and de more raod is more contract gat to give out an de mor contract gat to give out is de more..

Well  dem boys better nat talk before dem get in mo trouble

Talk half. Leff half!


Marriage dem pon de rocks

Oct 31, 2022 Dem Boys Seh, Features / Columnists, News --- Source ---

Kaieteur News- Dem boys hear dis one pon Tik Tok. A man went to he pastor and tell he pastor how he want to live forever.

De pastor look at he and tell he, “Get married!”

De man was surprised. So he asked de pastor, “Dat gan make me live forever?’

De pastor answer, “No, it will kill de desire?’

Deh gat some people in Guyana nah want get married. Dem courting dem girls fuh years and dem nah want to tie de knot. De more dem girls and dem parents ask dem fuh get married, de more dem men mekking excuse.

Nuff young people afraid to get married. Dem claim dem want enjoy life before dem tie de knot.

It remind dem boys of de story of de man wah walk into a bar and tell de barman, “Meh twenty year old son asked meh what marriage was like. So ah had to give he a demonstration.

“So, what yuh tell him”   de bartender asks.

“Ah told him, ‘It’s fine.’ And then ah gave him the silent treatment for three days.”

Some people does come to dem boys and ask dem boys how dem marriage last so long. And dem boys does try to be honest and give dem de benefit of years of wisdom and experience. De odder day one man come and ask dem boys de secret of dem marriage. Dem boys explain, ‘’ Meh wife and I take time to go to de restaurant two times a week – a little candlelight, dinner, soft music and dancing. She go Tuesday and dem boys go on Fridays.

Talk half. Leff half.


Lula is back!

Nov 01, 2022 Dem Boys Seh, Features / Columnists, News --- Source --- https://www.kaieteurnewsonline.../11/01/lula-is-back/

Dem Boys Seh…

Kaieteur News – Lula come back in power. He get a another chance. But he barely scrape home with a victory by less than 2%.

De man is fighter. De fuss three elections de man contest he lose. Den he win and step down because of term limits. When he try fuh come back, dem disqualify he by charging he with trumped up charges and dem throw he in jail. He successor get removed also in a legislative coup. But now Lula come back and win de elections, even though it was a really close contest

De Brazilians elections commission put Guyana to shame. Dem finish de tabulation within hours of de polls. And was more than 123 million persons voted in dem election. Yet dem could ah get de results out in quick time.

In Brazil voting is compulsory from age 18 to 70. So yuh gat to vote.

De reason why dem get de results so quick is because dem gat voting machines and day add up de votes quickly. But in Guyana we political parties nah want introduce voting machines. Not even fuh local government elections which are less contentious.

De Opposition now talking about biometrics. But dem fuhget we done gat biometrics in we elections. At each polling station dem gat a folio with all yuh  biometric details including yuh photograph.

So while dem now calling fuh biometrics, dem nah calling fuh voting machines. De opposition nah playing games with dem supporters mind because dem don’t know how fuh come out and tell de people how is nat true dat dead and migrant people voted.

Talk half. Leff half.


Old age pension is not an entitlement

Nov 02, 2022 Dem Boys Seh, Features / Columnists --- Source --- https://www.kaieteurnewsonline...-not-an-entitlement/

Dem Boys Seh…

Kaieteur News – People under de wrang impression. Dem feel dat de country awash with oil money. But if dem only know dat Guyana pocket get pick and de oil companies is de one wah mekking de real dollars. Wah we getting is chicken feed. It nah enough fuh do de things dat people feel de government can do. And until people understand dat, dem gan have false expectations.

Oil prices high and so de country getting a little extra from de oil sales. But dat is not going to last forever. De oil monies can drop. Right now de prices lil high and so do government decide fuh pay out a lil $28000 to de more than 40,000 pensioners.

Is one-off payment because de government know dem can’t sustain a higher pension because dem know dat eventually de oil prices can decrease.

But one lady seh how de govament shoulda pay $100,000 instead of $28,000. Well if yuh do de maths, it would a tek more than 4 billion dollars fuh pay dat $100,000 per pensioner.

And no pensioner nah entitled to nuttin. Dem nah contribute to pension scheme. Wah dem getting is not an entitlement. Nah get mix up!

When de Pee N Cee was in power, yuh used to have qualifications fuh get old age pension. Only a selected number of people used to get de pension. But Grandpa Cheddi come and seh dat everybody over 65  years old should get once dem living in Guyana. But yuh know yuh gat some people living overseas want dat money.

So thank God for small mercies and enjoy yuh $28,000. As fuh dem wha want de $100,000, dem better wake up from dah sleep wah dem deh in.

Talk half. Leff half


Don’t worry. Be happy!

Nov 03, 2022 Dem Boys Seh, Features / Columnists, News --- Source ---

Dem Boys Seh…

Kaieteur News – Dem public servants nah worried about salary increase. Dem know dat it coming as sure as day follows night.

Dem bin around lang enough fuh understand how de Pee Pee Pee Cee does operate. Dem does wait till de end of de year and dem does calaulate de inflation rate and den add on something and all it George. Dem does mek de increase retroactive. Dat mean de workers getting a full years backpay fuh enjoy de Christmas. And privately nuff of dem public servants would concur dat dem like it day way because dem does be flush fuh de holidays.

De Opposition know dat too, And so dem mekking a lot of noise about de workers deserving $150,000 per month minimum. Well dem bope dat some of dem wah gat people wukking in dem office and at dem house gan get from de same Opposition de $150,000. But dem boys also remember de saying, “ do suh nah like suh.”

De Opposition know dat back pay coming. So dem trying fuh tek credit fuh it while creating too high expectations fuh meal de workers feel discontented with whatever de shaart man gan stump up.

Dem police, firemen, soldiers, and prison warden gan get in good. By dew ay dem prisoners deserve a tap-up too. But yuh gat to talk to another man fuh get dat approved

De shaart man gan be most popular man in December. Everybody gan be swarming he fuh find out how big gan be de back pay.

Talk half. Leff half !


Pressure buss pipe

Nov 04, 2022 Dem Boys Seh, Features / Columnists, News --- Source --- https://www.kaieteurnewsonline...ressure-buss-pipe-2/

Dem Boys Seh…

Kaieteur News – De pressure de boss man of de Waterfall paper bin applying finally pay dividends. De Vee Pee buckle under de pressure and announce dat de new fiscal terms of future oil agreements gan gat a 10% royalty. Please note is fuh future oil agreements.

Glenn Lall been calling fuh higher royalty rates fuh a lang time. He keep up de pressure and now de government announce dat future oil deals gan gat 10% royalties. But dem nah talking about de 11 billion barrels in de Stabroek Block wah only paying 2%. So de fight fuh a better deal gat to be kept up.

But despite Jagdeo plans for future oil deals, dem oil companies gan still be smiling. Because de Pee Pee Pee does collect with one hand and give back to investors with de odder hand. Dem proposing a 10% royalty but dem also only collecting a small corporation tax of 10%.

Dem local companies gan complain. Because de local corporation tax is 40% fuh commercial companies; non-commercial companies paying 25%.

So while royalty rates fuh future companies looking nice fuh Guyana, de corporation tax is a giveaway and dem local companies gan be asking fuh a 10% corporation tax across the board.

De fact dat de government talking about a 10% royalty shows dat dem know dat a higher royalty rate is possible. But de Americans gat dem in a vice and dem can’t touch de Exxon contract. By de time Exxon done with we, de only royalty we gan able fuh talk about is de King of England.

Talk half. Leff half !


De Media mekkin de News

Nov 09, 2022 Dem Boys Seh, Features / Columnists, News --- Source --- https://www.kaieteurnewsonline...edia-mekkin-de-news/

Dem Boys Seh…

Kaieteur News – Like dem Reporters mekkin’ de news more den dem reporting de news dese days.  We gat some of dem before de Court allegedly fuh some offence. We gat another one wah get charge with cyber crimes.. And one of dem bin get charge and put before de court on a narcotics offence.

Yesterday a boat with some media people turn over in de Pomeroon River and sadly one of dem Photographer died. Dem boys sorry and express sympathy to de family.

De odder day, some of dem N Cee N workers talk how dem get harass at ah APNU meeting. De Opposition deny any such thing happen. But de Press Association come out in support of dem media workers.

But dem boys more interested in whether some of dem Reporters gan appear before de Commission of Inquiry into de March 2020 elections. Dem Reporters bin see what going on during de attempted rigging.

Dem boys remember also how outside of GECOM some of dem Reporters get rough up. Dem get call all manner of names also and some of dem girls start fuh cry.

So dem boys waiting fuh see how many of dem Reporters gan appear before de COI fuh tell dem experience. Dem boys waiting fuh see how much of dem gan turn up and give evidence against dem people wah bin abuse and assault dem.

Dem boys might have to wait in vain because nuff of dem Reporters does be afraid fuh go and give evidence dat can incriminate any political party and dem activists. But dem good at writing and issuing statement.

Talk half and Leff half.


History does go around in circles

Nov 10, 2022 Dem Boys Seh, Features / Columnists, News --- Source --- https://www.kaieteurnewsonline...o-around-in-circles/

Dem Boys Seh…

Kaieteur News – De Opposition does behave as if dem gat transport fuh dem supporters. Dem does want decide wah dem supporters muss hear and what dem must not hear. Dem nah want government people go into dem constituency. It is as if certain parts of Guyana is only reserved fuh dem and dem alone.

Dem critical of de government and claiming how de government nah doing much fuh dem supporters. But when de government try fuh go and meet with dem supporters and to respond to dem needs, yuh reading how dem preventing de government from doing so.

Dem talking about apartheid state but it is dem wah dividing de country in political blocks. How dem reacting mekkin’ people feel that some areas are reserved only fuh only dem and de government politicians can’t go in deh.

Dem seh how de state media bias and don’t give dem coverage. But when de state media turn up fuh cover dem meeting, is wan set of confusion. It look as if what dem want tell dem supporters dem nah want de rest of the de country fuh hear.

Dem boys remember when during Burnham time, de police used to pick up de WPA supporters put dem in a bus and drive dem down dah lang rode alongside de Providence Police Station. De idea was to tek yuh into de PNC stronghold so that dem supporters could rough yuh up. Wah dem politicians didn’t know was dat nuff of dem people used to help out dem wah get drop off behind God’s back.

And during de elections campaign in 2015, de Opposition send people to disrupt de government rally in Buxton. De speakers had trouble being heard over de noise wah did commit. And de message was clear; this area is out of bounds. Dem afraid fuh de supporters hear what de government had to say.

History does repeat itself and expose all de vagabonds.

Talk half and leff half.


People going deaf in de country

Nov 21, 2022 Dem Boys Seh, Features / Columnists, News --- Source --- https://www.kaieteurnewsonline...-deaf-in-de-country/

Kaieteur News – De Ministry of Health looking fuh some ear doctor. Dem seh how we gat too much people wah hard ears. But dat is only part of de hearing problem wah de country gat. De biggest problem is dat one in every five of we people hard of hearing.

And it all cause by too much noise. Yuh walking pun de road and dem drivers mekking yuh jump when dem blow dem horn. And dem blowing dem horn on anything. If dem see a nice gyal, dem blowing dem horn. If dem want yuh to stop, dem blowing dem horn. And if dem want yuh pass, dem blowing demk horn. If dem see Glenn Lall and he protestors dem blowing dem horn.

Yuh deh in de minibus and de music blasting loud enough fuh deaf yuh. Yuh go to a birthday party and yuh can’t hear what de person next to yuh saying. Dem playing de music too loud.

Yuh go to de cricket ground and dem gat big speaker box blaring music. De same at de football ground. Soon enough yuh gan gat to get ear plugs at de funeral.

All dat noise producing a deaf population. It mek dem boys remember de boy wah carry he girlfriend fuh meet he mother. He tell he girlfriend how he mother deaf and she gat to speak slowly and loudly. And he tell he mother how de girlfriend disabled.

Talk half. Leff half.


Voting gan become like opening a bank account

Nov 23, 2022 Dem Boys Seh, Features / Columnists, News --- Source --- https://www.kaieteurnewsonline...ning-a-bank-account/

Kaieteur News – By de time de riggers done with de election system, it gan gat rules like de AMLCFT laws. Going to de polling station gan be like go to de bank fuh open a new account.

Dem get ketch cheating de election and dem trying fuh hide dem shame by shedding blame pun de system. But is nat de system is de problem; is de mwah trying fuh cheat de system.

Is like if a thief man come in yuh house. And when he get ketch, he blame you fuh not grilling yuh windows. Dat is how barefaced de riggers are. Dem blaming de system fuh dem cheating habits.

Yuh gan gat to produce two forms of photo identification. Yuh national identification card gan can’t wuk. In order to vote yuh gan also need proof of address, a job letter from your employee and, to add insult to injury letter from your Doctor to show dat you are not dead and letter from de passport office fuh show yuh still in Guyana.

If yuh pass dat test yuh still gat fuh go through de finger print machine. If de machine stick, nor nah wukking, yuh can’t vote. Dat is de type of safeguards wah de riggers want fuh protect de elections system.

But dem boys know dat deh gat an easier way. Ban de riggers from tekking part in de elections and deh nah gan gat no problem. De International Olympic Committee (IOC) did ban Russian athletes from participating in de Olympics because of cheating.  So nutting wrang with banning cheaters from we elections.

Talk half. Leff half!


Prezzie does wake up early!

Nov 24, 2022 Dem Boys Seh, Features / Columnists, News --- Source --- https://www.kaieteurnewsonline...-does-wake-up-early/

Dem Boys Seh…

Kaieteur News – Deh gat certain sports which are rich people sports and deh gat certain sports which are poor people sport. Now when dem boys speak about rich people and poor people, dem nah mean that poor people don’t go to dem bourgeois sports. In fact, without de patronage of de poor people, dem rich people sports would flop.

Certain sport does be considered rich people sport because poor people could only afford to be spectators and not participants.  Last week, dem rich people had dem fun with motor racing. And dem big boys was there and received ovation because de government help motor racing sport with new tarmac.

But every Sunday morning, dem poor people does gat to be hiding and dodging de police. Dem does gather pon Cuffy Square and when dem feel de police nat around, dem does hustle with dem dray cart race. Now dis is poor people sport and de government does try fuh suppress rather than support it like how dem supporting motor racing.

Dem boys see dray cart and goat racing as poor people sports. But it can become, along with bird whistling, tourist attractions. So dem boys calling pon de President fuh regularize dray cart racing and fuh promote goat racing and bird whistling competitions.

Dem poor people sport gat nuff money already in it. Million dollar bet does pass pon a Sunday morning, pon Homestretch Avenue. So money is nat de problem. De problem is recognition of dem poor people sports.

Dem boys know Prezzie does wake up early.  Dem boys inviting he to Cuffy Square pon a Sunday morning.

Talk half. Leff half!


De empty seat in de stadium

Nov 25, 2022 Dem Boys Seh, Features / Columnists, News --- Source --- https://www.kaieteurnewsonline...-seat-in-de-stadium/

Dem Boys Seh…

Kaieteur News – Everybody watching de World Cup football. And some people wondering when Guyana gan ever mek de Finals.

When Guyana di fuss play a World Cup Qualifier dem did beat Suriname at Bourda. Deh had some people wah did gat ambitions dat we gan beat West Germany in de finals. Guyana get knack out in de return leg in Paramaribo when Suriname kankc we fuh 3 goals.

Since then Jamaica and Trinidad did reach de finals. But Guyana still deh in de same place and in look like if we gan leff deh fuh a lang time.

People traveling from all over de world fuh support dem team. Dem nah gat no team from de West Indies in de football World Cup. But one man from Trinidad went to see the matches in Qutar.

He mek he way to de seat which was right next to de pitch. When he sit down and de match start, he notice dat de seat next to ge is empty. He leans over and asks his neighbour if someone ganbe sitting there. ‘No,’ says the neighbour. ‘ De seat is empty.’

“ Dat is incredible,” said the  Trini man. “Who in deh right mind would have a seat like this for the Final and not use it?”

De neighbour said to he, “Well, actually de seat belongs to me. I was supposed to come with meh wife, but she passed away. This is the first World Cup Final we haven’t been to together since we get married.”

“Oh, I’m so sorry to hear that. That’s terrible….But couldn’t you find someone else, a friend, relative or even a neighbour to take her seat?”

The man shakes his head. “No,” he said. “They’re all at the funeral.”

Talk half. Leff half!


Christmas Day will be observed on Boxing Day!

Nov 30, 2022 Dem Boys Seh, Features / Columnists, News --- Source --- https://www.kaieteurnewsonline...erved-on-boxing-day/

Dem Boys Seh…

Kaieteur News – Well hear this now! Christmas Day is now Boxing Day and Boxing Day is now de after Boxing Day. And New Year’s Day is now on January 2nd and not on January 1st.

Dis is according to de government. Dem issue a Notice which state dat Christmas Day will be observed on Monday December 26th. And Boxing Day will be observed on Tuesday December 27th and New Year’s Day will be on Monday 2nd January 2023.

So dem boys asking when is Ole Year’s Night. Is it on December 31st 2022 or it’s on New Year Night, January 1, 2023?

Guyana nice bad!. Only in Guyana, yuh does gat dese things happening. Guyanese people like holiday. Nuff a dem does like de rest. Some people does put dem holiday to good use and so dem does want know when is holiday.

Dem boys had to go back and read de law fuh sort out dis kerfuffle. De law seh how every Sunday is a holiday. It also seh dat if dem days wah does be declared a holiday fall pon a Sunday den de next day is a holiday.

So is nat a case whereby Christmas Day gan be observed on December 26th. Is a case whereby if dem days wah does usually be designed fuh a holiday fall pon a Sunday, de Monday gan be a holiday.  And why dis is so. Is because every Sunday is already a holiday and therefore if another holiday fall pon a Sunday, den de next day is also a holiday.

Talk half. Leff half!


Back pay done before it received

Dec 06, 2022 Dem Boys Seh, Features / Columnists, News --- Source --- https://www.kaieteurnewsonline...-before-it-received/

Dem Boys Seh…

Kaieteur News – It used to one time a year de government used to gat to go back to Parliament fuh approval fuh spend mo money. But now is two time a year dem going back.

And is nat because of any emergency dat dem gat. Is because dem trying fuh do more. But dem should have known dat when dem preparing de Budget.

In odder countries, people would be asking questions as to why dem did not get it right during de Budget estimates. Why two times a year yuh gat to ask fuh supplementary approval. And why so late in de year yuh asking when de Budget gan soon come out or we gat to wait until March.

De freeness nah done yet. Wan more announcement gat to be made. De Disciplined Services grow accustomed to an extra month bonus fuh Christmas. Is only dem does get bonus from de PPPC government.

De rest of workers does be thinking dat de back pay dem getting is bonus. But back pay is not bonus. Back pay is back pain because some people does cater fuh it even before dem get it. Nuff back pay done spend out even before it received. Orders done gone in fuh new fridge, new stove, new furniture and new blinds.

But some people quiet about de supplementary. Dem nah wan talk about de electricity support because it gan put a big hole in dah balloon wah dem blowing up about discrimination.

Talk half. Leff half!


Guyana looking fuh bonus from Exxon

Dec 09, 2022 Dem Boys Seh, Features / Columnists, News --- Source --- https://www.kaieteurnewsonline...uh-bonus-from-exxon/

Dem Boys Seh…

Kaieteur News – Dem oil companies mekking good money in Guyana. Dem mekking good money all over de world. So much so dat some Governments imposing windfall tax on dem. Dat is a higher tax wah countries does put pun companies wah mekkin super- profits.

All across Europe, dem Government putting windfall tax fuh prevent dem companies from mekking super- profits because of de high price to petrol. One country put a 60% windfall tax pun dem oil companies. Meanwhile in Guyana, we paying dem oil companies tax.

But while dem oil companies doing well, Guyanese ketchin dem tail. De cost of living still high and no matter wah de Government do, some prices nah coming down. De price of food in de market gone up and while de Minister of Agriculture talk dat de country gat enough chicken fuh Christmas, he nah talking how chicken retailing fuh $100 more per pound dan before.

And chicken is poor man meat. Dem poor man gan eat chicken fuh Christmas. And dem gan dream about de oil money and how one day dem might be able to afford duck and turkey.

But dem rich people gat it good. De higher de cost of living, de more profits dem mekkin because dem just adding on extra to wah dem does sell.

Dem rich people like de oil companies. De more times get hard, de more money dem mekking.

Talk half. Leff half.


De noisy season deh pon we!

Dec 22, 2022 Dem Boys Seh, Features / Columnists, News --- Source --- https://www.kaieteurnewsonline...y-season-deh-pon-we/

Dem Boys Seh…

Kaieteur News – This is nat de season fuh ole people! Some of dem already getting nervous about what gan happen on Christmas Eve Night and Ole Year’s Night with de firecrackers.

When is not de sound of explosions, is de loud music wah keeping dem awake all night. Deh gat some bars in residential areas wah nah gat brakes. Dem playing dem music loud and it causing dem ole people house to vibrate. Is a dread situation fuh dem ole people.

Nowadays dem gat so much stray dogs pon de road dat dem does be barking all night. Disturbing dem ole people.

Den dem car driving pon de road and who nah blasting music from speaker box, blowing dem horn. It enough to rattle de nerves of dem ole people and mek dem deaf.

It mek dem boys remember de story of de man wah think dat he wife going deaf. So he decide fuh test she hearing.

While she deh standing near de kitchen sink, he stand about six feet from her and asked “What’s for dinner, dear?”

When there’s no answer, he tek a few steps forward and repeats de question.

Again, there is no response. So he moves right up to her shoulder and talking into her ears says,  “What’s for dinner, dear?”

At this, his wife turns around angrily and shouts, “For de third time, ah telling yuh is chicken curry!”

Talk half. Leff half!


Now yuh gat to buy bottle water fuh brush yuh teeth

Jan 04, 2023 Dem Boys Seh, Features / Columnists, News --- Source --- https://www.kaieteurnewsonline...fuh-brush-yuh-teeth/

Dem Boys Seh…

Kaieteur News – A man eat he belly full when he went back ‘home’ fuh Christmas. He eat anything dat was offered. He lash down de roast duck, de mutton curry, de fried chicken and even de bake fish. Den he wash dah down with some good rum and tonic. De man leggo a belch and was just going to tek a five when he remember how de dentist did tell he, dat he must brush he teeth after every meal and mek certain he gargle well.

De man go to de pipe in de bathroom fuh wash out he mouth. When he turn on de pipe, he thought was five year old coming out of de tap. When he bin small, de water used to come out like lemon wash. But now it tun de colour of dark rum.  De water bin brown, brown. He start fuh holler fuh help saying dat he nah seeing good, and how de water nat only dark but it smelling stink.

He tell de people how he nah like de colour of de water coming out de tap. Dem tell he don’t bother, we can give you de trench special. Right away sleep leff de man eye. He asked, “Trench special?’

‘Yes,” de people tell he, “we gat a whole bucket of trench water fuh yuh wash yuh mouth with.”

Is den de man decide day,  he gat to get de next speed boat out because he went in de same trench earlier, and he know de color of de water.

Talk half. Leff half!


Add Reply

Link copied to your clipboard.